大叔的愛 – 呂爵安 Edan(田田)
Viu製作嘅全港首部BL劇《大叔的愛》，顛覆傳統電視劇題材，呢15集為觀眾、網民帶嚟歡樂，每位演員都人氣暴升。
呢幾日Edan同Anson Lo嘅ig po，一出就十幾萬like，證明大家有幾咁喜歡「田田」同「阿牧」。
前晚《大叔》播完大結局，演員開live傾下偈時亦講出一個重點，Stanley話《大叔的愛》正嘅地方係香港電視一個突破，「因為表達愛唔應該有咁多界線、咁多框架，你喜歡就愛而冇傷害任何人就得。」
Edan(呂爵安)跟住就補充喺拍劇過程中，梁祖堯同佢提過，知唔知拍呢部劇嘅意義喺邊？
其實呢套劇對於接受程度或者文化上係有意義，Edan話：「同性戀喺以前大家未必會講出嚟討論，唔好講攞嚟拍劇做主軸，仲要我哋擺到明係。呢套劇嘅成功，除咗我哋演員好開心之外，亦都代表緊大家嘅認知同接受程度已經開通咗好多，我覺得呢個意義好重大。」
《大叔》仲有為大家帶來啲咩呢，Anson Lo噚晚喺社交平台發千字文，講返自己拍呢套劇嘅心路歷程，佢亦重提曾經講過「每個人都需要一個阿牧」，「因為佢令我明白日常生活上待人處事可以再多啲企喺人哋角度諗、多啲照顧身邊嘅人、佢對愛情嘅執著，同埋提醒我係時候要認真學下煮嘢食。」
AL希望大家感受到港版《大叔的愛》嘅認真同埋背後意義，感受到每一個角色嘅投入，而佢係好享受演戲，會繼續努力，希望下次畀大家睇到唔同嘅一面。