好多人都話，人大咗、生活上多咗掣肘，就好難再去追夢。不過，伊朗呢位41歲嘅奧運射擊選手就冇放棄到嘞～
呢位伊朗嘅射擊選手Javad Foroughi喺噚日嘅奧運男子10公尺空氣手槍決賽中，射出咗244.8環，打破咗呢個項目嘅奧運記錄奪得金牌，仲成為咗伊朗史上最年長嘅奧運金牌得主𠻹！
見到佢咁犀利嘅戰績，大家可能都以為佢係老臣子啦～不過原來Foroughi竟然係喺四年前先開始受訓，而喺短短幾年間就可以有咁輝煌嘅成績，靠嘅就係佢嘅堅持同努力。
41歲嘅Foroughi正職其實係一個夜更護士，佢喺大學期間曾經係步槍射擊運動員，但係去到10年前先第一次接觸手槍射擊，直至四年前先開始正式接受專業訓練。
一直有一份穩定嘅工作、去到37歲先要來追呢個運動員夢，Foroughi為咗生計，喺訓練嘅同時都要繼續工作。
不過由於大部份比賽都喺日間進行，佢唯有要改返夜更，並抽工餘時間嚟練習。佢話自己之所以可以堅持落嚟，全因為「我鍾意射擊」，即使返夜更係辛苦啲都可以忍受。
憑住佢一番嘅努力同堅持之下，佢終於開始喺射擊運動得到彪炳嘅成績，仲喺東京奧運開始之前，攀升到世界排名第四。喺東京奧運中，佢一直努力奮鬥、打敗唔同對手，直至噚日嘅決賽佢贏得冠軍之後，仲興奮到跪地吶喊、同教練相擁。
就好似佢自己咁講：「我總係努力比前一日嘅自己做得更好。」從佢呢個老來先嚟去追夢、仲要破埋紀錄、攞埋奧運冠軍嘅勵志故事，證明到有心唔怕遲呢個道理～只有不停咁樣努力超越自己、朝住自己嘅目標前行，總有一日我哋都可以發光發亮㗎！