【Mike導新廣告冇格仔 粉絲認唔出以為韓國人】
Mike導冇格仔，又冇眼鏡，仲係咪Mike導？當然係啦，不過就好多人唔認得啫！
因為ViuTV綜藝節目《ERROR自肥企画》爆紅嘅幕後「格仔導演」Mike導劉諾衡，喺節目推出之後，同Agent L.一樣成為廣告寵兒，Mike導呢兩個月嘅IG，明賣廣告嘅已經最少七單，仲未計網上一啲短片廣告。
今日（12號）佢放咗有份拍攝嘅手錶廣告硬照，由於包咗頭巾，拉直咗頭髮，加上冇格仔冇眼鏡，睇咗幾秒都唔多認到佢係邊個，有資深fans都認唔出，仲以為係女model定韓國Oppa，不過亦都有人覺得好有型。
一向以顛覆見稱嘅Mike導，連拍廣告都好顛覆下，好似早排佢接咗個護膚品廣告，不過由於「格仔先係本體」，所以賣護膚品廣告但塊面又打格仔呢件咁矛盾嘅事，就出現喺佢身上。之但係佢都好識做，出唔到塊面，於是將啲Mask搽落腹肌度，又引嚟粉絲尖叫呀！