有「巨龍」稱號嘅MIRROR成員Stanley（邱士縉）噚日31歲生日，fans「Team Stanley」集資為偶像賀壽。
有巴士車身廣告、包起旺角家樂坊旁邊嘅行人巷貼滿大型海報，仲有「Stanley 29+ 2:《PLAYXHIBITION》」展覽等等。
Stanley係完全感受到fans嘅愛，特登去巴士打卡。
而夜晚就同拍拖4年嘅女友Alina（李炘頤）食日本菜撐枱腳，Alina亦好有心思，喺間屋佈置咗波波汽球，同男友切cake慶祝。
Stanley好感恩自己一直被愛包圍。
噚日佢喺社交平台發文，「幸運的我，入行三年，身邊很多善良的人都願意幫助我，愛我。無錯，係你呀，係你呢，唔好四圍望。」
佢好感謝工作夥伴、朋友、粉絲、觀眾，沿途上有不同嘅支持。
之前《紐約時報》形容MIRROR嘅出現為香港注入歡樂，Stanley覺得愛係互動，「有人說，慶幸這個年頭有我們的出現，我們又何嘗不是有你們的支持呢？」
所以Stanley話會繼續努力，做好每一個作品，演好每一個角色，唱好每一句，繼續帶歡樂俾大家。