Viu今年成績踏大步，MIRROR同ERROR嘅成功帶動到成個台生猛晒，仲為公司帶來可觀收入。
除咗呢兩個天團外，早排我哋有提過強尼嘅廣告超多，其實一姐Hailey陳俞希都成績彪炳，由今年開始到依家已經接咗接近20個廣告，仲要唔計出席品牌活動，呢個廣告量以現有活躍於電視台嘅女藝員嚟講，都數一數二啦~
Hailey接嘅廣告包括沐浴露、超市、護膚品、保險、飲品、食品、生活用品、煮食用具等等，類型多元化，相信《空肚講宵夜》呢個節目入屋多多少少幫到手。
Hailey承認今年係收入多咗，「我都代我媽咪多謝咁多位客戶，因為好多（收入）都係用喺屋企人身上同做善事，雖然係多咗，但係工作唔會嫌多，希望客戶繼續多多支持八婆基金，多多益善少少無拘。」
Hailey一向有做流浪貓狗義工，今年佢有義助慈善機構「阿棍屋」，又捐錢俾「大樹下善待動物庇護站」同埋參加活動支持，身體力行出錢出力。
講開Viu走勢凌厲，有消息話今年有bonus分，Hailey即刻話：「下？無聽過喎，我代啲藝人多謝你哋，希望高層睇到呢個訪問。」
另外有指黃Viu嘅付費用戶喺東南亞超越NETFLIX，成東南亞第二大串流平台，僅次於Disney+。
Hailey就回應：「如果係真嘅就真係好開心，因為最近我有份同播緊嘅《直播王》，都得到海外嘅媒體留意，希望嚟緊有多啲其他地方會買入我哋台嘅節目，我自己就希望有多啲劇集拍啦，因為自己都好期待再喺劇集上面見到大家。」