今屆帕奧真係有個埃及運動員用口打乒乓波,佢個名叫Ibrahim Hamato

乒乓波,用手打㗎嘛!無手,唔通用口?係呀,今屆帕奧真係有個埃及運動員用口打乒乓波,佢個名叫Ibrahim Hamato。

Ibrahim今年48歲,喺佢10歲時因為一次火車意外而喪失雙手。佢住個條村,得兩款運動有人玩,就係足球同乒乓球。「點睇我都似係踢波㗎喇!」

Ibrahim當時係咁諗,不過咁容易估到個尾就唔係人生啦~

有一次,佢幫兩個朋友嘅乒乓球賽做計分,點知兩個人因為分數有拗撬,其中一人叫Ibrahim唔好干涉,因為佢永遠都打唔到兵乓球,Ibrahim無傷心,反而因為呢句說話激發佢開始打乒乓波。

無手,可以用口咬住拍打,不過點開波呢?Ibrahim有練過用格肋底夾住個波嚟開,不過就唔多成功,所以改用腳嚟夾住個波嚟拋。呢個開波方法亦令佢成名,仲得到「Mr Impossible」嘅稱號。

48歲嘅Ibrahim話過,佢想同全世界講無嘢係不可能嘅,所有人都應該做自己喜愛、對自己好嘅事。「殘障唔係在於四肢,而係在於無得堅持做自己喜歡嘅事。」

今次係佢第二次參加帕奧,雖然第一仗不敵韓國嘅朴洪圭,但佢喺比賽當中不落下風,仲嘗試採取主動,甚至逼到對手打到刁時。下場佢會對中國嘅陳超,Ibrahim要努力呀!