楚撚記大排檔呈獻 方皓玟LOST n FOUND演唱會

方皓玟(小明)入行近20年首度紅館開騷,一連四場嘅《楚撚記大排檔呈獻 方皓玟LOST n FOUND演唱會》演唱會噚日開鑼,全場爆滿。小明第一次開紅館騷非常認真,舞台設計、燈光、舞蹈、造型等等都悉心炮製,本地concert嚟講好高質。

小明唱出多首歌曲例如《Freedom》、《TMD》、《異流》、《Let’s Say》、《Won’t You Stand》、《哭乾了眼淚》、新歌《你好嗎》同《浮沙》等等,《人話》當然係高潮,呢part仲有50位着黑衫同帶黑口罩嘅舞蹈員伴舞,用身體同動作砌出人字、打交叉手勢,場面震撼;另一part就有12位肌肉男伴舞,演出同樣好睇。

演唱會中段,舞台營幕出現一段小明嘅「骨氣文」:「骨氣,是當你在黑暗中,能拯救你的最後一把尺!希望大家繼續保持這份骨氣向前走!」

小明成晚講嘢唔太多,但再三多謝觀眾支持,「依家大家生活上可能有啲唔開心或者有啲壓力,所以多謝大家今晚嚟,俾個機會我,俾個機會大家一齊去感受一個好難忘嘅晚上,再次多謝你哋嚟到。」

今次演唱會嘉賓有RubberBand、林家謙同章尾而,當章尾而唱《I wanna be strong》之後,小明亦有感而發,「我哋好努力做好多事情去付出,其實係為咗下一代年青人,好proud of自己係香港人。」小明跟住唱出《假使世界不似你預期》,觀眾仲開手機一齊揮手附和。

另外,小明演唱會由楚撚記大排檔做冠名贊助,觀眾睇完演唱會,憑票尾去楚撚記或者姊妹店有9折優惠~

發佈留言

發佈留言必須填寫的電子郵件地址不會公開。