喺《男排女將》飾演「黃金sir」嘅陳宇琛（Sam），喺劇中同MIRROR、ERROR成員結戲緣，近日佢除咗同原班人馬演出《力圖打排球》外，亦喺姜濤同肥仔嘅《特務肥姜2.0》mv亮相，扮演型男，鏡頭唔多但charm！
現年42歲嘅Sam，爹哋係資深藝人石修，Sam 24歲入行拍《四葉草》，曾被力捧，但演藝路途上上落落，2014年離開TVB去港視，之後開製作公司、演出唔同platform嘅劇集同節目，喺呢行都係由年輕做到大。
呢次同肥姜合作，Sam話同肥仔比較熟，因為合作咗幾次，「今次拍mv同埋最近一齊錄《力圖打排球》，再同肥仔傾多咗深入了解，一直覺得佢好識得尊重別人係無論台前幕後，好有諗法，對自己做嘅嘢好有方向，好有領導能力同大將之風。」
對於年輕嘅姜濤，Sam評分甚高，「姜濤俾我感覺係一個gentle soul，心思細膩，好多著名嘅藝術家都有同類特質，對我來講佢唔單止係一個優秀嘅performer，亦都係對自己嘅藝術好高要求嘅人。」
拍《力圖》，Sam日日對住MIRROR同ERROR呢班後生仔，其實對上拍《男排》已經將近兩年前，依家一班隊員都大個咗，Sam就話：「MIRROR & ERROR呢班後生仔都仲係咁可愛，但係我都感受到佢哋已經成熟咗，各自都搵到自己嘅character。呢一代嘅年青人都好有自己嘅諗法，勇於表達自己，佢哋掂㗎啦。有乜嘢需要我一定會支持，就好似今次mv咁。」