什麼是「168飲食法」?
人到中年，身邊好多朋友都考慮去做體檢。
有啲朋友睇落唔算太肥，但係點知體檢報告出咗之後發現原來體脂超標，要健康就一定要努力減去體脂。上網做咗一輪資料蒐集後發現而家好流行用「168飲食法」去減脂。唔知各位 #50後 你哋有冇聽過呢？
一般傳統嘅減肥方法係限制你食啲咩，而「168飲食法」則著重於進食嘅時間。
「168飲食法」嘅宗旨係將一日入面嘅熱量攝取量集中喺8小時之內，其他時間都唔可以食嘢，但係可以攝取一啲零卡路里嘅嘢例如茶同黑咖啡。
簡單嚟講我哋嘅身體喺每次進食之後，都需要7-10小時去消耗已經攝取嘅熱量，「168飲食法」係透過輕斷食嘅方法，令身體空腹16小時，當身體冇再吸收新嘅熱量，包含內臟脂肪在內嘅體脂肪就會開始燃燒，從而減低體脂。
16小時空腹聽落好似好漫長，其實一半都係睡眠時間，只要稍微延遲早餐時間，提早食晚餐，一般上班族都可以輕鬆執行。例如最受歡迎嘅方法就係中午12點食一個Brunch (早午餐），晚上8時前食完晚餐，之後唔好再食宵夜，已經可以達到「168飲食法」嘅要求。
執行「168飲食法」嘅時間其實非常彈性，大家可以根據自己嘅時間表去調整，如果一開始覺得好困難，可以從12小時、或14小時空腹開始，循序漸進地慢慢增加自己的空腹時間，去幫助身體燃燒體內脂肪。
仲有斷食期時一定要飲多啲水，同埋少量多餐，有助維持血糖穩定，降低飢餓感。
最後，進行「168飲食法」期間，要注意可以食嘢嘅時候唔好因為補償心態而暴飲暴食。
除此之外，一定要注意總熱量嘅攝取量，攝取嘅食物要營養均衡，再加上適量嘅有氧運動，減脂效果自然事半功倍。
另外，如果你本身係有有胃潰瘍嘅問題，或者係學生、平時工作需要大量體力嘅人或者係孕婦都唔適合進行「168飲食法」呀！