男人的浪漫，豆腐火腩飯
女人的浪漫，銀龍白汁飯 (銀龍=龍利雪魚，白汁=忌廉汁)
男人的浪漫，梗係豆腐火腩飯啦！
「火腩飯潮文」喺出自一位［高登會員］發表嘅一篇關於火腩飯嘅食後評。由於佢將「男人的浪漫」描寫得淋漓盡致，因為咁而畀人視為係潮文嘅經典。潮文嘅開頭同埋結尾，係出自黃子華喺1994年嘅棟篤笑《末世財神》嘅。
「豆腐火腩飯」
我每食完一碟火腩飯之後，都會同我女朋友講分手
因為我知道，佢已經唔再明白我
佢唔知道我喺大排檔所經歷過嘅有幾多
佢問我食乜，我真係唔想答佢
日本嘢？秦國嘢？真係膚淺！
究竟我仲可以繼續忍受自己嘅伴侶將啲生嘅肉放入口
每舊火腩都經過紅紅烈火，百度高溫
係經過歷煉，係經過漫長嘅試鍊
每一舊都有佢嘅歷史，佢嘅故事
魚生究竟有啲乜，根本就好似啲白痴港女咁
一無所知，戇鳩鳩，生勾勾
我恨我嘅人生唔可以好似嚿火腩咁
搵到咁多好嘅伴侶，豆腐，涼瓜，冬瓜，枝竹…各有特色
亦搵唔到咁多知音人
有時侯，我自己一個坐喺大排檔食火腩飯
我覺得自己係孤獨，我覺得呢個世界係冇人明白我
我叫咗枝青島，我望住杯入面黃色嘅啤酒
我望唔透，我望唔清究竟呢個世界仲有幾多嘢我係掌握到
我好迷茫…
我離開大排檔，我畀錢嘅時侯發覺有個OL食緊枝竹火腩飯
我望住佢，佢望住我，我地互相點點頭
我好感動，原來呢個世界仲有人係同我有相同既諗法
我忍住淚水，走出大排檔，點起支煙，頭都冇回就走返屋企
或者個OL會問，點解我放棄呢一段咁難得嘅姻緣
我唔知道，喺呢一刻，我覺得我係，一個浪子
～完
