張敬軒相隔10年再度當選叱吒我最喜愛男歌手

商業電台主辦的本地樂壇盛事「2023年度叱吒樂壇流行榜頒獎典禮」（簡稱「叱吒2023」），元旦夜在大嶼山赤鱲角亞洲國際博覽館Arena舉行，由台柱林海峰（Jan）負責構思、頒發「叱吒樂壇我最喜愛的男歌手大獎」（簡稱「叱吒我最喜愛男歌手」）之前出現的表演環節，乃全晚高潮所在。

有別往年，今屆阿Jan既沒有製作二創短片，亦沒有在開金口唱歌，僅在台上演講，由頭「齋Talk」到尾，並且「玩人前先『玩』自己」，將上月中（2023年12月15日至17日）在同一場地舉行演唱會期間出現過的「『我最喜愛的男歌手』頒獎＋唱歌」綵排環節再做一次。開始之前，阿Jan先來一次「民意調查」，到底有多少人看過這個「綵排」：「大部份都睇過喇下嘛？有冇人未睇嘅呢？！」結果台下只有零碎的歡呼聲，於是他繼續說：「即係冇人未睇喎真係吓嘛？咁睇過嗰啲介唔介意睇多次？」這一問，台下立即起哄。

正當大家都疑惑「林狗堅係玩翻兜？」、「唔通林狗乾塘冇橋？」的時候，原來阿Jan早已將這個演出全面「升級」，集中火力「針對」今屆真正得獎者 ── 自2014年度（2015年元旦頒發）得過「叱咤我最喜愛男歌手」之後，相隔10年再度「當選」的張敬軒，接二連三的挖苦「軒公」，重提他多次失落這項大獎的傷心史，引來全場爆笑連連。

講了大約五分鐘左右，阿Jan終於入正題。「年年都係咁啊，咩頒嗰個咩『我最喜愛男歌手』，林海峰又喺度玩人，好過份……我都有反思我係咪好過份……但係我會繼續玩落去㗎，因為有一個人我一路玩唔到，佢冇上過嚟，佢一直喺台下面，大家有眼見㗎，所以其實我唔係好過份啊，我一年玩人都係玩一次㗎喳，有票喺手嘅歌迷，佢哋係玩一個人玩足10年啊！所以如果今日你覺得畀人玩緊，或者係你知道有成班人夾埋專登玩你一個，甚至你覺得，個天係咪玩緊我？唔好氣餒，繼續玩落去。張敬軒示範咗畀大家睇，咩叫做有玩未為輸，而佢從來冇講過一句；『你唔好玩我啦！』相反佢係繼續努力咁玩，好認真咁玩，玩佢好嘅音樂，不卑不亢，唔怕輸，努力玩，10年，係足足10年！十年磨一劍，叱咤歷史性時刻，重要嘅嘢講三次，我最喜愛的男歌手：張敬軒！張敬軒！張敬軒！」

聽到阿Jan在台上宣布結果一刻，全場掌聲雷動，倒是「軒公」顯得有點錯愕，好像不敢相信10年之後，自己真的能夠再度「當選」（從說話的口形推斷，他向身旁的許廷鏗說了一句「Oh my god！」）。他在台下先向所有現場觀眾鞠躬致謝，在台上從阿Jan手中接過獎項後再高呼「多謝大家！」，再接連說了兩次「嘩！」，頓了一頓，「軒公」再說：「正如啱啱阿Jan所講，喺呢幾年嘅樂壇，其實都唔係呢幾年喇，我自己參加咗『叱咤頒獎禮』咁多年，其實每一年嘅trend（潮流）都變緊，我哋嘅生活環境，我哋嘅社會，我哋嘅時代都變緊，但係我想喺呢一度，好謙卑咁樣去多謝每一位喺今年有投票畀我嘅朋友……我知道有好多嘅票數，唔一定係嚟自我自己嘅歌迷，係嚟自其他嘅觀眾，或者其他歌手嘅歌迷，我想喺度亦都要衷心咁多謝你哋每一位，畀呢個信任我，多謝大家。」「軒公」又特別點名多謝「鏡粉」：「我見到我IG好多嘅follower，其實佢哋嘅icon（頭像）全部都係MIRROR啲成員嘅樣。」

之後他有感而發的說：「其實，你問我，我哋嘅廣東樂壇喺而家成個亞洲區嘅音樂市場入面嘅持份額已經相對係好少啊，每年嘅頒獎禮，當然啦，為咗頒獎禮有氣氛，為咗個市場熾熱啲，我哋有好多唔同嘅新聞，但係我覺得，我哋每一個歌手都係as one（猶如一體），我哋都係一家人，我哋一切去做好我哋自己小小嘅香港樂壇……時代嘅變遷，令到我覺得，每年我坐喺叱咤頒獎台下面，同我同年入行嘅歌手，已經一個比一個少，去到而家全部都係新嘅面孔，都係呢幾年好受歡迎嘅歌手，但係對於我自己嚟講，我覺得唯有我對呢個行業、我對呢個世界保持住強烈嘅好奇心，先至可以令我繼續進步，繼續有得發展，我要好衷心多謝香港，因為我作為一個廣州人，喺香港打拼咗23年，好多謝大家由接納我，去到相信我，今晚呢一個獎項，我覺得係呢個城市畀我嘅一個blessing，亦都係一個信任，2024年我就會帶住呢一個獎項去報答呢個城市嘅人，去做一啲我自己覺得好聽嘅歌，去做一啲大家願意見到張敬軒有新發展嘅嘢。依然好似我往年一樣，好似一個新人咁樣，去做好自己嘅本份，去報答大家喺今年1月1號，推我上嚟呢個『叱咤台』嘅每一票，多謝你哋，thank you！」

來源: 游大東影視筆記