張家朗、江旻憓創下香港首次有兩位劍手同時登上世界第一嘅紀錄

張家朗日前喺劍擊世界盃埃及站花劍項目上面，先後淘汰俄羅斯劍手Marsel Nagimov及意大利劍手Daniele Garozzo晉級。

不過可惜喺之後輸俾中國劍手莫梓維止步16強，呢次交手亦係張家朗與莫梓維六次對碰後首嚐敗績

話雖如此，張家朗仍然憑住今次世界盃分站賽事嘅分數，壓過意大利劍手Tommaso Marini重登男子花劍「世一」寶座，加上本身已經係女子重劍「世一」江旻憓，創下香港首次有兩位劍手同時登上世界第一嘅紀錄。

可惜嘅係，由張家朗、崔浩然、吳諾弘同蔡俊彥組成嘅花劍隊今年未能獲得巴黎奧運資格。

佢地喺劍擊世界盃巴黎站失準僅排15，而中國隊喺呢站賽事拎到第五，巴黎奧運積分追過港隊，雖然港隊喺之後嘅埃及站嘗試力挽狂瀾，可惜先後喺四強及銅牌戰不敵日本及美國，只能獲得第四。

由於之後都冇世界盃分站賽事，港隊因而錯失奧運男子花劍團體資格。

現時取得奧運花劍團體賽入場券嘅有世界排名頭四嘅日本、意大利、美國、法國，及亞大區第一嘅中國。

錯失團體賽資格，亦意味港隊將失去咗三個個人賽席位，只有力求衛冕嘅張家朗能夠憑著「世一」獲得奧運個人賽資格。

而香港「世一」劍後江旻憓領軍嘅女子重劍隊，目前都仲有機會獲得巴黎奧運團體賽資格。

現時港隊「女重」領先中國四分，港隊只要喺下個月嘅世界盃南京站入面嘅賽事，排名高過中國就可以進軍奧運。

假若失敗咗，就只能同男子花劍隊一樣，得「世一」嘅江旻憓可以出戰女子奧運重劍個人賽。希望一眾女將可以繼續努力，為港隊爭取更多奧運席位。