騙案實錄：假律師信

親戚WhatsApp 左假律師信俾我，佢開頭都以為係真律師信，但我睇一睇，唔對路。

大家睇下呢度post 出來既假律師信cap 圖，成封信都有極多問題：

1. 我第一次見律師信個Subject Matter 會咁模糊不清。我自己以往既習慣，係會寫為乜事欠款－包括咩合約，幾時簽訂，幾時開始無還錢同其他相關編號之類。呢度一劈頭就話你欠兩萬六千七百九十二，我幾時借既先？有無合約副本俾我睇？

2. 一般人或者無咁清楚，但我幾年無撈都睇到間律師行有問題啦！香港係有幾間開業都有一段時間既大陸律師行，中倫係其中之一。但中倫唔係叫中倫文德，香港間中倫，叫中倫律師事務所有限法律責任合夥，如果你唔清楚，請上香港律師會網頁度搜尋已登記註冊左既合法律師行名稱。出律師信既所謂中倫文德，係香港胡伯全律師事務所同北京中倫文德律師事務所係深圳前海開既律師行，地址唔係中環太子大廈而係深圳南山前海。太子大廈係香港胡伯全律師事務所既地址。總之，香港中倫，香港胡伯全同深圳中倫文德係三間不同既律師行，呢封信魚目混珠，亂咁來。記住，唔清楚就上香港律師會網頁查詢！

3. 剛才話三間係不同既律師行，你仔細睇睇假律師信既律師名單，全部都係香港胡伯全律師事務所既律師。深圳中倫文德有自己一班律師，全部都幾乎係大陸律師。律師名單仲有樣野錯，就係香港只有賴顯榮律師而無賴顯茶律師。大家想搵律師行既律師名單，香港律師會網頁有得search，不過你地唔會search到我，因為我已經退左會。仲有，律師名單下既Mediator串錯做Mediat。

4. 假律師信既抬頭。大佬呀，你有合約的話，而且你個客俾左 instructions 你，你點解唔直接寫名而要寫 Dear Sir / Madam?

5. 一般律師信會由負責既律師簽律師行名，但呢度無簽名。

6. 為左兩萬幾蚊你出律師信？你好多錢倒落鹹水海？兩萬幾蚊自己公司用template 出封 demand letter 再入小額錢債啦！仲等對方唔回覆你再使兩三萬出Writ？仲有呀，香港地，要去老地出Writ，對方要欠七萬五至三百萬先可以出架！兩萬幾就去小額錢債，而小額錢債係唔可以請律師架！

7. 好啦，封假信叫你還錢係直接存錢入一個不知名既銀行戶口。喂，正途來講律師點會叫你無啦啦入錢落一個無名戶口？點樣正式discharge liability? Anti Money laundering 睇得咁嚴,你律師行夠膽咁求其了結件事?

8. 睇下封假律師信既字體，隔行，同中文版既細節？仲有中英文縮係一張信紙！我以前咁寫肯定我個supervising partner 會屌撚到我塌皮。

9. 仲有一點，就係封假信寫道 with the next 5 days。係 within the next 5 days 呀！況且如果呢封係第一封 demand letter / pre-action letter，你俾得五日人，你上到庭係咪想個官話你俾唔夠時間，然後叫你食左今日個cost?

依家世界經濟咁低迷，騙徒四出偷呃拐騙，大家要好好保護自己，有咩問題直接上香港律師會網頁查。呢班友既手法，來來去去都係同一套路，如果你為人容易急同亂，就好容易俾佢地陰到。

更多騙案資料 : 【騙案實錄】