2004年02月15日【蘋果專訊】

駕火球車離險地

「火好大，我怕會變成『火燒連環車』，如果附近貨櫃箱載有易燃貨品好似打火機重大鑊，所以唔驚得咁多，第一時間將個火拖架拖出空地再算，當時好似拖住個大火球咁，真係好驚險！」。葵涌貨櫃碼頭一個露天停車場，一架貨櫃拖架疑因附近雜草垃圾火被波及燒車轆，一名英勇貨櫃車司機不顧危險駕駛本身貨櫃車拖頭，將火拖架拖至安全地方由消防員將火救熄，火警中無人受傷。

現場為葵涌貨櫃碼頭路，七號貨櫃碼頭對開一個可以停泊一百五十多輛各式車輛的大型露天停車場。昨晨十時許，停車場內一架貨櫃拖架尾部八個車轆，疑因附近雜草垃圾意外火被燒，一時火光熊熊。

拖往百米外空地

旁邊一輛貨櫃車拖頭正在等候到附近貨櫃碼頭取貨，車上姓李（五十八歲）司機見狀未有即時開車避開，反作出英勇舉動：「架火拖架附近有好多貨車同貨櫃車，好易變成『火燒連環車』，如果貨櫃箱載有易燃貨品好似打火機咁，燒起好大鑊。千鈞一髮之際，我無諗自己有冇危險，即時用我架拖頭將火拖架拖出百多米外空地，再等消防員救火。」

駕駛貨櫃車三十年的李先生，形容當時好驚險：「好似拖住個大火球咁濃煙密布，拖住個架出空地個三、四十秒都好驚好緊張，好彩我技術純熟，拖架甩架絕無問題，減少好多危險。」

李先生將火拖架拖出百多米外空地後，即時「甩架」開走拖頭免被大火波及。

消防員趕至十多分鐘後將火撲熄，無人受傷。事後自詡為「醒目司機」的李先生，對於自己化解了一場危機感到驕傲。

記者：梁維建