2004年10月25日【蘋果專訊】

民主黨成員鄭家富近來心情麻麻，皆因選舉過後是非多多，一時被傳內訌，一時又被傳分裂。問到佢自己會否被人撬走另起爐灶，鄭家富話做人要飲水思源，自己都算係民主黨正資產，好希望個黨可以振興咁話。

阿富話最近唯一令佢開懷的消息，就係女兒代表聖士提反女校，參加上周係意大利舉行既國際歌詠大賽，結果由四十一位同學組成既合唱團，係來自二十八個國家同地區既隊伍中勇奪冠軍，捧盃而回。負責領軍既李老師，更榮獲指揮大獎。

鄭家富重講笑，話學校可以成立一個名人家長會，因為唔少立法會議員同社會名人既千金，都係該校讀書，現任議員中，已有鄭家富、郭家麒、梁家傑、石禮謙四個係聖士提反家長，而D9林瑞麟、樂施會總幹事莊陳有、恆生大班鄭海泉千金亦在該校。至於威水校友，數到天光都數唔晒，呢期最紅就有立法會主席范徐麗泰、教育統籌委員會主席王易鳴，重有商台董事兼總裁俞琤同藝人吳君如；當然大家都唔會忘記，前保安局局長葉劉淑儀亦係該校畢業生。

呢四十一位聖士提反女校合唱團代表係意大利贏得國際歌詠大賽冠軍，認真威水，而帶團參賽的老師當然亦係功不可沒啦。