Viu TV開創全港電視史上首部BL劇《大叔的愛》，星期一首播第一集，黃德斌一改鐵漢風格，飾演擁有少女心嘅大叔，由於反差太大令到成件事好搞笑，而兩位MIRROR成員Edan嘅爆笑演繹、Anson Lo扮暖男，甚至已經有一段時間冇喺香港露面、特登喺加拿大返嚟拍呢部劇嘅簡慕華等，各人演出都贏到觀眾稱讚。噚晚就有消息傳出，《大叔的愛》首集最高收視點去到8.7（每點觀眾人數65,540)，即係有超過57萬觀眾捧場，成為Viu TV開台5年嚟最高收視嘅劇集！

Viu TV開創全港電視史上首部BL劇《大叔的愛》

第二集，田一雄（Edan飾）勇救KK（黃德斌飾）後暈低，KK感動到一嘢攬到阿田實一實，仲浮現少女微笑嘅滿足感，演出惹笑；另一幕阿牧（Anson Lo飾）喺浴室向沖緊涼嘅阿田示愛兼咀埋落去，fans個個尖叫！

Edan仲喺ig發文，話自己嘅螢幕初吻就咁冇咗！要睇阿牧同KK點爭田田！相信可以進一步打爆個收視，希望Viu再上一層樓！

港版《大叔的愛》成為全城熱話，個個講起都好開心，難怪令Viu TV收視創新高。噚晚播映第三集嘅爭仔戰，講黃德斌扮演嘅「KK」帶咗自製嘅愛心豬腳飯，同飾演「田田」嘅Edan撐枱腳，中途KK講起有次仆街拗柴，好彩當時有田田幫佢包紮隻腳，諗起呢個畫面時佢又嚟少女心，一頭挨落田田個心口兼示愛：「你將會成為童話中嘅主角，我係你嘅灰姑娘，你係我嘅白馬王子。」Edan就嚇到成個樣were晒，呢場戲笑死~

之後Anson Lo飾演嘅阿牧殺到同KK爭仔，搞到本身鍾意女人嘅田田變咗夾心餅；而去到劇集尾段，田田開口講唔捨得阿牧搬走，呢對同居男男嘅感情終於提升到友達以上，阿牧呢位暖男隨即向田田吻額，戀人？未滿嘅！田田嚟緊又會畀咩搞笑反應呢？