【大叔的愛】Anson Lo 發千字文:每個人都需要一個阿牧

《大叔的愛》昨晚大結局,飾演阿牧的Anson Lo今晚在ig發千字文,分享拍此劇的感受。

他說:「多謝阿牧教咗我好多嘢。好早前我講過『每個人都需要一個阿牧』,因為佢令我明白日常生活上待人處事可以再多啲企喺人哋角度諗、多啲照顧身體嘅人、佢對愛情嘅執著,同埋提醒我係時候要認真學下煮嘢食, 感激大家對我嘅包容,演戲上有太多地方要學習同努力。希望大家感受到港版《大叔的愛》嘅認真同埋背後意義,感受到每一個角色嘅投入。」

原來當初考慮接不接時,他覺得會有一定壓力,皆因日版實在令人太深刻。

「每一個角色都好獨特又岀色,每一個場口都好自然但有趣,每一段關係都好虐心但溫暖。自己一開始係好擔心演繹唔到日版嘅精神,甚至會糟蹋咗日版,令大家失望。

但心裏知道呢個係一個好好嘅機會去試煉,去測試一下自己繼《男排女將》Bobby一角之後可以做到幾多,所以最後同花姐講『我想拍』。」

【阿牧的不是味兒】

他坦言:「對我嚟講嗰兩個幾月嘅拍攝,喺精神上係幾疲累demanding嘅感覺。

好記得第一次由頭到尾睇晒成份劇本之後,第一個感覺係:阿牧最開心時嘅energy level都唔及Carmen姐嘅一半,成套劇佔咗三分二嘅場口都係比較負面嘅情緒,劇本上好多時岀現嘅一句演員指引就係『阿牧不是味兒反應』。

拍攝頭幾日我都仲摸索緊『不是味兒』係一個咩情緒;但拍攝日子愈來愈長,我就開始明白阿牧嘅不是味兒喺每一場都可能有少少分別,可能係失望?失落?妒忌?心煩?寂寞?」

【Anson Lo在這個世界彷彿消失了】

在拍攝期間,「我自己覺得『Anson Lo』喺呢個世界彷彿消失咗咁。

好多時拍攝完返到屋企係好攰,但會有個意識叫自己執下嘢、做下家務。有時搭車返劇組開工嘅車程途中,聽住『阿牧歌單』,望住車窗岀面嘅天空都係灰灰暗暗。

可能係絕大部份嘅場口情緒,令自己好似被好多重寂寞嘅氣圍包圍住。」

他指最近好多親戚朋友問,他在劇中拍攝傷心或哭泣的戲份時,在想甚麼?他坦言好多場口都是跳拍,全部不是跟劇本正常timeline拍,即使拍「分手」那一場戲時,其實尚未拍過任何阿牧和阿田sweet、拍拖的場口,所以好多時自己只能靠幻想。

拍攝「分手」戲之前,他跟田田呂爵安在熄了燈的房間中醞釀情緒。

當時他不斷幻想,「阿牧同阿田未發生過嘅拍拖日常畫面、阿田同梓芊一齊咗嘅畫面、阿牧提出分手之後入房執行李離開嘅畫面。或者未必係一個好正確嘅方法,但係我當時唯一依賴嘅做法。」

【感謝每一位觀眾】

他很感謝每一位觀眾支持《大叔的愛》,支持阿牧。

「呢三個星期收到好多大家嘅留言,見到大家都好代入每一位角色去分析劇情,你哋會跟住我地笑、跟住我哋喊。

呢三個星期就好似每晚都同大家一齊睇電視咁,大家唔單止會聽主題曲同片尾曲,仲會同阿牧一齊聽阿牧嘅歌單,一齊去感受阿牧嘅內心世界,好感恩可以同你哋每一位有一個咁大嘅bonding。」

他同時感謝ViuTV令到港版《大叔的愛》誕生,多謝監製Tommy和導演CK對他的信任。

「好記得拍攝中段我成日問兩位我有啲咩要調整,佢哋異口同聲答我:『如果你做得唔好我哋一定會同你講,但首先你要畀多啲信心自己,唔好下下覺得自己一定會做得唔好。』」

Anson Lo表示:「會繼續努力,因為我知道我真係好享受演戲!希望下一次再畀大家睇到Anson Lo唔同嘅一面!」

大叔的愛 劇集演員 – 逐個捉

發佈留言

發佈留言必須填寫的電子郵件地址不會公開。