大叔的愛 – 陳子豐(Darren)

陳子豐 Colin

「Darren」,其實佢真正嘅英文名係Colin,陳子豐憑《大叔的愛》「Darren」呢個角色彈起,為佢行咗24年嘅演藝路增添色彩。

陳子豐係舞台劇演員出身,近10年由now到Viu,又主持又拍劇,喺電視生涯有高低起跌,佢會以「一直順流而行」嚟形容呢段過程,因為做幕前係好被動,「無論係主持定演員,藝人都係一個被選擇嘅角色,被選中了,亦控制唔到觀眾嘅反應。

所以對我嚟講,藝人只有一個選擇,就係認真工作,唔好浪費每一次演出機會,因為你永遠唔知仲有無下次。」

呢10年唔易捱,陳子豐坦言係有諗過放棄,「大概6年前,我有一位曾經做過電視台嘅朋友,勸我轉條跑道,跟佢去做保險經紀。

當時見佢做得有聲有色,我就抱住一試無妨嘅心態去做。

結果嗰一年,考保險牌開會見客,愈做愈覺得嗰個披住稱身西裝嘅自己好陌生,每一日都好似扮演緊另一個人咁。

我發現鏡頭下嘅自己先至係最自在最真實活着。

就係咁,我就確定咗我最想做嘅始終係為觀眾帶嚟娛樂,我放棄咗轉行,亦同時放棄咗『放棄演藝路』呢個選擇。」

《大叔的愛》播出後,Darren令觀眾留下深刻印象,陳子豐嘅演出獲得讚賞,佢會有咩感受?

「最開心嘅係為觀眾喺帶嚟三個星期嘅歡樂,每一位觀眾網民嘅留言我都睇晒,好多謝佢哋對我嘅鼓勵,而令我印象最深嘅係,《大叔的愛》令佢哋重拾追看電視劇嘅樂趣。」

咁佢有咩想同觀眾、網民講?「多謝觀眾,你哋嘅支持係對從事電視行業人員嘅最大動力。電視並唔係夕陽工業。」

陳子豐捱出頭,依家佢會唔會target演員係永久事業?

佢就話自1997年第一次踏上舞台開始,佢就一直以演員呢個目標而行,「呢24年來,雖然冇想像咁順利,但好慶幸我依然站在演員嘅路上。

想趁呢個機會多謝我人生第一位戲劇老師,風車草劇團嘅邵美君,多謝佢引領我見識到演員呢門表演藝術。

作為演員,每次收到劇本,每次飾演一個新嘅角色,都係一個新嘅挑戰,就係呢一種每一次唔同嘅新鮮感令我愛上呢個行業,希望廿四年後,我依然站在演員嘅路上。」

大叔的愛 劇集演員 – 逐個捉

發佈留言

發佈留言必須填寫的電子郵件地址不會公開。