一連四場嘅《楚撚記大排檔呈獻 方皓玟LOST n FOUND演唱會》

方皓玟(小明)一連四場嘅《楚撚記大排檔呈獻 方皓玟LOST n FOUND演唱會》噚晚喺紅館舉行尾場,黃耀明、王宗堯、釗鋒、Tyson Yoshi、朱薰同埋羽球運動員伍家朗等等都有現身捧場。

去到尾場台前幕後同觀眾都會特別多感受,喺演唱會臨近尾聲,當《你是你本身的傳奇》同《假使世界原來不像你預期》嘅音樂前奏響起時,觀眾已經主動開電話燈揮動。

台上嘅熒光幕影住現場觀眾時,大家見到入鏡都好投入好熱情打招呼,仲大叫「你是你本身的傳奇」,氣氛感人。

小明事後話:「自己唱呢兩首歌時,我覺得呢部份好有香港嘅氣味,好似共度咗一段時間之後大家互相認識,大家都有共同嘅回憶,亦都係互相支持對方,所以整個氣氛都好warm。雖然嗰度冇特別嘅舞蹈,但係呢部份嘅感動就係嚟自己大家有共同嘅感受,所以變咗大家一齊互相支持的時候,我自己都被感動。」

小明噚晚完騷後再度上台Encore,佢係受到觀眾熱烈嘅反應打動,所以加碼獻唱,連續唱咗《如果想我哭》、《無人像你》及《Life Is So Beautiful》。

最後,小明邀請所有演出單位包括RubberBand、林家謙、章尾而同埋樂隊成員一齊鞠躬,完美落幕。

發佈留言

發佈留言必須填寫的電子郵件地址不會公開。