Ian應援團衝出香港進佔英國 姜濤「西多士號」Jeremy「九尾狐號」行駛港九

【Ian應援團衝出香港進佔英國 姜濤「西多士號」Jeremy「九尾狐號」行駛港九】
MIRROR點解咁紅?明嘅人自然會明!

12子各有鏡粉支持,組織一系列應援撐偶像,呢期又輪到姜濤、Jeremy(李駿傑)同Ian(陳卓賢)嘅fans上陣,齊心協力支持偶像。

姜濤有份演出台劇《超感應學園》,扮演角色叫「西多士」,劇集將於9月13日喺ViuTV播出,為咗幫偶像打響聲勢,姜濤香港後援會安排「西多士號」巴士畀fans打卡,「新巴城巴專頁」出post,指由今日(星期一)傍晚起,兩架車身內外都貼滿姜濤嘅巴士於港島出沒。

今次行駛路線包括新巴2A(8月30日起)同新巴106(8月31日起),姜糖留言:「又一個帶動香港經濟嘅實例,香港人大家support咪好囉,放鬆D啦」。

有網民嫌106路線乘車時間太長,姜糖指只會搭一兩個站影夠就落車,所以條線再長都冇問題。

至於早前推出新歌《搞不懂》嘅Ian,MV喺YouTube已有逾180萬點擊,與Ian相隔9,600公里嘅UK hellosss,為英國應援精心安排三連擊,包括:Waterloo火車站內有大型電視廣告、倫敦巴士站廣告、派發新歌宣傳Postcard,Ian日前喺IG限時動態都有轉貼應援帖文。

而9月8日踏入26歲嘅Jeremy,粉絲專頁「Ninetales.Jeremy」為偶像炮製九巴1A路線嘅「九尾狐號」,行走油尖旺至東九龍慶祝「豬仔誕」(Jeremy暱稱),Jeremy曾經講過自己最鍾意嘅動物係神獸九尾狐。

發佈留言

發佈留言必須填寫的電子郵件地址不會公開。