「鄧謝配」再次揚威德國！

香港羽毛球代表鄧俊文/謝影雪，喺德國公開賽混雙決賽，面對韓國對手金元浩/鄭那銀，唔算遇到太大考驗，直落兩局21:13、21:19勝出，繼上年11月嘅沙卜勤公開賽後，再次喺德國奪標，勇奪今年首冠。

德國公開賽係兩人自謝影雪一月中喺印度公開賽膝傷後，復出嘅首個賽事。

晉級過程當中有三場要打足三局，加上鄧俊文亦喺半準決賽觸傷左膝，「鄧謝配」呢次冠軍可以話係得來不易，奪冠後兩人進一步鞏固出戰巴黎奧運嘅資格！

「鄧謝配」之後會轉戰750賽事嘅法國公開賽，呢個仲係喺奧運場地舉行嘅測試賽，「鄧謝配」上屆曾經奪得亞軍，呢次可唔可以更進一步，為巴黎奧運打下強心針呢？